कांग्रेसय् युवा दस्ता दयेकेगु ज्याया आलोचना
येँ (सन्ध्या टाइम्स)/माओवादीया वाईसीएल व एमालेया युथ फोर्स थेंज्याःगु हे शक्तिशाली युवा दस्ता दयेकेगु धकाः कांग्रेसया छथ्वः नेतातय्सं यानाच्वंगु कुतःयात पार्टीया कार्यवाहक सभापति सुशील कोइरालां आलोचना यानादीगु दु। वय्कलं थौं थःत नापलाः वःपिं कांग्रेस कार्यकर्तातलिसे खँ ल्हासें कांग्रेसपाखें अज्याःगु दस्ता दयेकेगु छुं हे योजना मदुगुलिं सुनां नं अज्याःगु दस्ता दयेकल धकाः उमित कारवाही यायेगु जुइ धकाः समेत ख्याच्वः बियादीगु दु ।
कांग्रेसया नेतात शेरबहादुर देउवा व खुमबहादुर खड्का समेत जानाः कन्हय् काभ्रेय् छगू ज्याझ्वः यासें कांग्रेसया ल्याय्म्हतय्गु 'तरुण दस्ता' सार्वजनिक यायेगु धकाः ग्वसाः दयेकातःगु दु। तर थौं वयाः कावा सभापतिं थथे धाःगुलिं उगु ज्याझ्वः अन्यौलय् लाःगु दु ।
