नेपालय् नं शुरु जुल विश्वकपया ज्वरो
येँ (सन्ध्या टाइम्स)/दक्षिण अफ्रिकाय् थनिंनिसें विश्वकप फुटबल शुरु जुइत्यंगु दु। थ्व झ्वलय् नेपालय् नं फुटबलप्रेमितय् दथुइ कासाया 'ज्वरो' शुरु जूगु दु। कासाया झ्वलय् येँया झोछेँ, केलत्वाः आदि थेंज्याःगु त्वालय् फुटबल म्हिताच्वंगु थीथी देय्या ध्वाँय् ब्वयेकाः रौनक बढे यानाच्वंगु दु ।
उखे थीथी देय्या ध्वाँय् छापे जुयाच्वंगु टीशर्ट बजारय् अभाव जुया च्वंगु दुसा टीशर्ट छापे याइपिं व्यवसायीतय् लिमलानाच्वंगु दु। मेखे ठमेलया छुं डान्स रेष्टुरेन्टतय्सं विश्वकप जःछि डान्स बन्द यानाः फुटबल जक क्यनेगु ज्याझ्वः दयेकूगु दु। अथे हे नेपाः लगायत थीथी देय्या ध्वाँय् ब्वयेकाः फुटबलप्रेमितय्सं थौं सुथय् येँय् छगू मोटरसाइकल नं पिकाःगु दु ।
