प्रधानमन्त्री व सुद दथुइ खँल्हाबंला
भारतया दबावया कारणं प्रधानमन्त्री माधवकुमार नेपालं राजीनामा मब्यूगु धकाः द्वपं लानाच्वंगु इलय् भारतीय राजदूत राकेश सुदं प्रधानमन्त्री माधवकुमार नेपालयात नापलानादीगु दु । शुक्रवाः प्रधानमन्त्री निवास बालुवाटार थ्यंका राजदूत सुदं प्रधानमन्त्री नेपाल नाप राजनीतिक दलत दथुइया सहमति, शान्ति प्रकृया व संविधान निर्माणया बारे खँल्हाबंला यानादीगु खः ।
छुं दिं न्ह्यः जक एनेकपा (माओवादी)या अध्यक्ष पुष्पकमल दाहाल 'प्रचण्ड' भारत प्रति इंगित यासें प्रमुख स्वंगू दलत दथुइया सहमति कार्यान्वयन मजूगुया ल्यूने कांग्रेस व एमाले बाहेक मेगू हे शक्तिया ल्हाः दुगु खँ धयादीगु खः ।
उगु इलय् प्रधानमन्त्री नेपालं सुदयात लिप्पांगु राजनीतिक घटनाक्रमया बारे जानकारी बियादीगु खः । नापं वय्कलं भारतया मेघालयलय् नेपाली भाषीतय्त जुयाच्वंगु आक्रमण दिकेत नं इनाप यानादीगु खः ।
