उत्तरपुस्तिका छपाइ बारे झिन्हुया दुने प्रतिवेदन लःल्हायेत निर्देशन
व्यवस्थापिका संसदया सार्वजनिक लेखा समितिं उच्च माविया परीक्षाया उत्तरपुस्तिका छपाइलय् जूगु अनियमतताया बारे झिन्हुया दुने प्रतिवेदन लःल्हायेत शिक्षा मन्त्रालययात निर्देशन ब्यूगु दु ।
बिहीवाः च्वंगु समितिया बैठकय् शिक्षा सचिव शंकरप्रसाद पाण्डे व उच्च मावि शिक्षा परिषद्या सदस्य सचिव रामबहादुर खड्का नाप याःगु सहलह लिपा शिक्षा मन्त्रालययात अज्याःगु निर्देशन ब्यूगु खः । बैठकय् शिक्षा सचिव व परिषद्या सदस्य सचिवं कानून अनुसार हे प्रक्रिया न्ह्याकाःगु दाबी याःगु ख: ।
उत्तर पुस्तिका छपाइलय् व्यापक अनियमितता जूगु व आवश्यता स्वयां म्हो जक उत्तरपुस्तिका परीक्षा केन्द्रय् छ्वःगु गुनासो वयेवं समितिं पाण्डे व खड्का निम्हेसित सःतुगु खः । समितिं परिषद्या लेखा नियन्त्रक कामेश्वर मण्डल व मुद्रण विभाग सिंहदरवारया पदमराज पाठकयात नं सहलह यायेत मंगलवाः सःतुगु दु ।
