माओवादी तयार जुसाः सहमति जुइ : सिंह
नेपाली कांग्रेसया उपसभापति प्रकाशमान सिंहं एकीकृत नेकपा (माओवादी) तयार जुसाः जक सहमति जुइगु खँ धयादीगु दु । वय्कलं माओवादीं न्हापाया सहमति कार्यान्वयन यायेधुंकाः जक आ: सहमतिया वातावरण निर्माण जुइफइगु धयादिसें गुलि याकनं माओवादीं सहमति कार्यान्वयन याइ उली हे याकनं सहमतिया वातावरण निर्माण जुइगु धयादिल ।
नेपाल प्रेस युनियन पाल्पां बिहीवाः तानसेनय् याःगु पत्रकार नापलायेगु ज्याझ्वलय् न्ववानादिसें वय्कलं माओवादीं याकन सहमति याःसा प्रधानमन्त्री माधवकुमार नेपालं नं उलि हे याकनं राजीनामा बीगु धयादिल ।
माओवादी इमान्दार मजूगुलिं हे राजनीतिक समस्या मज्यंगु धयादिसें सिंहं माओवादीं ल्वाभः व शिविरय् दुपिं लडाकुया दम्भ पाखें सत्ता कब्जा यायेगु कुतः यानाच्वंगु द्वपं बियादिल । वय्कलं लडाकु व्यवस्थापन मजुइकं माओवादी नागरिक पार्टीलय् रुपान्तराण जुइमफइगु धयादिल ।
अथेहे वय्कलं न्हूगु राष्ट्रिय सहमतिया सरकारया नेतृत्व यायेत कांग्रेस तयार जूगु धयादिल । वय्कलं माओवादी व एमालें सरकारया नेतृत्व यायेधुंकूगु धयादिसें दक्वसियां सहमति जुसाः कांग्रेस सरकारया नेतृत्व यायेत तयार जूगु धयादिल ।
