गुम्ह सैनिकत कारवाहीलय्
तामिलया झ्वलय् धनकुटाया हिलेलय् सीम्ह सिपाही रेशमबहादुर भण्डारीया घटना सम्बन्धय् सैनिक अदालतं अधिकृत सहित गुम्ह सैनिकतय्त कारवाही याःगु दु ।
हिलेस्थित श्री नम्बर २ बाहिनी अड्डाय् सञ्चालन जूगु पेशागत तालिमया अभ्यास यायेगु झ्वलय् घनकुटा राम्चे डाँडाय् सिपाही रेश्मबहादुर भण्डारी माघ २७ गते सीगु खः । तालिमया झ्वलय् मन्यंसें पिने वंगुलिं सैनिकतय्सं भण्डारीयात ख्वाँउगु बँय् तयाः दाःगु खः । उगु घटना लिपा तच्वकं घा:पा: जूम्ह भण्डारी छुं दिं लिपा मदुगु ख: ।
घटनाया सम्बन्धय् पुलांम्ह पृतनापति उपरथी नरेन्द्र बहादुर रावलया अध्यक्षताय् गठन जूगु समरी जनरल सैनिक अदालतं गुम्ह सैनिकतय्त उगु घटनाय् दोषी ठहर याःगु खः । सैनिक जनसम्पर्क निर्देशनालयं बिहीवाः छगू विज्ञप्ति पिथना घटनाय् दोषी ठहर जूपिं अधिकृत सहित गुम्हेसित कारवाही याःगु बारे जानकारी ब्यूगु खः ।
सैनिक अदालतं जमदार राम कुमार तामाङयात न्हय्दँ कैद व भविष्यय् सरकारी सेवाया निंतिं अयोग्य ठहर जुइगु कथं बरखास्त या:गु दु । अमल्दार दिल बहादुर गौतमयात स्वदँ कैद व भविष्यय् सरकारी सेवाया निंतिं अयोग्य ठहर जुइगु कथं बरखास्त या:गु दु ।
अथेहे अमल्दार सुरेन्द्र कुँवरयात प्यला कैद व छगू दर्जा घटुवा, प्युठ कृष्णअर्जुन खड्कायात प्यला कैद व छगू दर्जा घटुवा, हुद्धा उमेशचन्द्र दाहालयात प्यला कैद व प्यदँ बढुवा रोक्का, प्युठ रघुलाल तामाङ्गयात प्यला कैद व स्वदँ बढुवा रोक्का, सिपाही मोहन कार्कीयात प्यला कैद व स्वदँ बढुवा रोक्का, प्युठ किशोर गुरुङयात निदँ बढुवा रोक्का या:गु दु ।
अथेहे उगु तालिमया झ्वलय् कमाण्डया रुपय् खटे जूम्ह उपसेनानी प्रवल देउलां कमाण्डरया हैसियतं थ:गु जिम्मेवारी वहन मयागुलिं निजयात स्वदँ बढुवा रोक्का या:गु दु ।
