'माओवादीया हे नेतृत्वय् न्हूगु सरकार'
एकीकृत नेकपा (माओवादीं) थःगु हे पार्टीया नेतृत्वय् न्हूगु राष्ट्रिय सहमतिया सरकार गठन यायेमाःगु निर्णय याःगु दु । पार्टी दुने पाखें नं अध्यक्ष पुष्पकमल दाहाल 'प्रचण्डं' हे सरकारया नेतृत्व याइगु निर्णय नं माओवादीं याःगु दु ।
बिहीवाः च्वंगु माओवादी पदाधिकारीतय् बैठकं राष्ट्रिय सहमतिया सरकारया नेतृत्व माओवादी पाखें प्रचण्डं हे याइगु अडान हानं लिसाः काःगु दु । प्रचण्ड बाहेक मेगू विकल्प थःपिंत मान्य मजुइगु खँ नं पदाधिकारीतय् बैठकं निर्णय याःगु दु ।
बैठक लिपा पार्टी उपाध्यक्ष नारायणकाजी श्रेष्ठ 'प्रकाशं' पत्रकारत नाप खँल्हाबंला यानादिसें माओवादीं सरकारया नेतृत्वया दावी मत्वतुगु कनादिसें अध्यक्ष प्रचण्डं हे सरकार नेतृत्व याइगु व उकीया बारे पार्टी दुने विवाद मदुगु कनादिल ।
अथेहे बैठकय् कांग्रेस व एमाले पाखें सहमतिया निंतिं तयार याःगु प्रस्तावयात एकलौटी जूगु ठहर याःगु दु । अज्याःगु प्रस्तावय् माओवादीयात दुमथ्याकूसें निगू दलं जक तयार याःगुलिं थःपिंत उगु प्रस्ताव मान्य मजुइगु खँ प्रकाशं कनादिल ।
सहमतिया निंतिं कुतः यायेत माओवादीं लडाकु समायोजन व मेमेगू विषयलया बारे स्थायी समितिया बैठकं निर्णय याइगु खँ क्वःछिउगु दु ।
