एमालें दयेकल राष्ट्रिय सरकारया खाका
येँ (सन्ध्या टाइम्स)/राष्ट्रिय सरकारया खाका तयारजुइवं प्रधानमन्त्री माधव नेपालयात राजीनामा बीकेगु निर्णय सत्तारुढ दल नेकपा (एमालें) याःगु दु। थौं सुथय् च्वंगु एमाले स्थायी समितिया बैठकं थ्व निर्णय याःगु खः। उकिया नापनापं एमालें राष्ट्रिय सरकारया खाका नं तयार याःगु दु ।
उगु खाकायात कयाः माओवादीलिसे खँ ल्हायेगु व माओवादीयात चित्त बुझे जुइक उकियात कार्यान्वयन यायेगु धकाः नं थौंया बैठकं निर्णय याःगु दु। सम्भवतः थौं एमालें माओवादी नेतातलिसे खँ ल्हायेफु धाःगु दु ।
एमालें तयार याःगु राष्ट्रिय सरकारया खाका धाःसा सार्वजनिक याःगु मदुनि। लिसें एमालें मेमेगु समस्यात नं थ्वहे खाका नापं प्याकेजय् समाधान यायेगु धकाः नं निर्णय याःगु दु ।
