विवेकपूर्ण रुपं ज्या यायेत नेतातय्त राजनया सुझाव
नेपाःया निंतिं भारतया पुलांम्ह राजदूत केभी राजनं झिदँया सशस्ज्ञ द्वन्द्व लिपा दिगो शान्तिया निंतिं नेपालं यानाच्वंगु कुतःयात विश्वं उदाहरणया कथं स्वयाच्वंगु खँ धायदीगु दु । वय्कलं द्वन्द्वया अन्त्य व संविधानसभाया निर्वाचन मार्फत लोकतन्त्रया सुदृढीकरणया निंतिं न्ह्यानाच्वंगु थ्व अवस्थाय् नेपाःया राजनीतिक दलया नेतात विवेकपूर्ण रुपं ज्या यायेत इनाप यानादिल ।
वय्कलं नेपाःया राजनीति वर्तमान अवस्थाय् संकक्रमणकालीन व संवेदनशील अवस्थाय् न्ह्यानाच्वंगु व सकुशल अवतरणया निंतिं नेपाःमितय् आकांक्षा बमोजिम नेपाःया राजनीतिक दलया नेतातय्सं गम्भीर रुपं सहकार्य यायेमाःगु धयादिल ।
नेपाः भ्रमणय् दीम्ह राजनं बुधवाः पत्रकारत नाप खँल्हाबंला यानदिसें भारत न्ह्याबलें शान्त व समृद्ध नेपाःया पक्षय् दुगु स्पष्ट यानादिसें निर्धारित इलय् हे न्हूगु संविधान व दिगो शान्ति स्थापनया निंतिं भारत सरकार नेपाःयात न्ह्यगु कथंया ग्वाहालि यायेत नं तयार जूगु धयादिल ।
अथेहे वय्कलं नेपाःया राजनीतिलय् भारतीय् पक्षं छुं नं हस्तक्षेप मयाःगु स्पष्ट यानादिसें भारतया थःगु हे आपालं समस्यात दुगुलिं नेपालय् छु राजनीतिक दल सरकारय् वनेगु वा प्रधानमन्त्री जुइगु धइगु बिषययात भारतं गवलें महत्व मबीगु व अज्याःगु ज्याय् भारतया च्यूताः नं मदुगु धयादिल ।
वय्कलं माओवादीं बहुदलीय प्रतिस्पर्धा व शान्तिपूर्ण राजनीतिक लँपु ल्यःगुलिं थ्वहे राजनीतिक सिद्धान्तया आधारय् शान्ति स्थापनाया निंतिं इमान्दार रुपं लगे जुसाः नेपाः व नेपाःमितय् भविष्य बांलाइगु धयादिल ।
