वाईसिएल जिल्ला नेताया हत्या / हत्या एमालें याःगु : माओवादी
एनेकपा (माओवादी)या भातृ संगठन वाईसिएलया सुर्खेत जिल्ल दुजः करबहादुर बुढायात अज्ञात पुचलं हत्या या:गु दु । दशरथपुर गाविस-२ स्थित छगू मिलय् द्यनाच्वंगु इलय् मंगलवाः बहनी बुढायात नापसंया सिमाय् हत्या या:गु खः । हत्या सुनां व छाय् यात धइगु खँ सिकेमफुनिगु व थुकीया बारे अनुसन्धान जुयाच्वंगु खँ स्थानीय प्रहरीं धाःगु दु ।
उखे माओवादीं बुढाया हत्या नेकपा (एमाले) सम्बद्ध युवा संघया कार्यकर्तातय्सं याःगु द्वपं ब्यूगु दु । माओवादी प्रवक्ता दिनानाथ शर्मां बुधवाः छगू विज्ञप्ति पिथनादिसें हत्याय् एमाले युवा संघया स्थानीय कार्यकर्ता जंगबहादुर राना, श्याम थापा, होमकिरण हुनिचङ लगयातया संलग्नता दुगु खँ घटनास्थल पाखें प्राप्त तथ्यं पुष्टि याःगु दाबी यानादीगु दु ।
विज्ञप्तिइ एमाले सम्बद्ध जंगबहादुर राना लगायत हत्यारातय्त तुरुन्त ज्वनेत, कानुनी कारबाही न्ह्याकेत व सीम्ह बुढया छेँजःयात यथोचित क्षतिपूर्ति बीत सरकार नाप माग यानातःगु दु ।
