सहमति कार्यान्वयन जुसाः च्यलाया दुने संविधान : नेम्वाङ
प्रमुख स्वंगू दलं जनता नाप क्षमायाचना यायेमा : सुवेदी
संविधानसभा अध्यक्ष सुवासचन्द्र नेम्वाङं प्रमुख दलत दथुइ जूगु स्वंगू बुँदे सहमति कार्यान्वयन जुसाः च्यालाया दुने न्हूगु संविधान निर्माण जुइगु खँ धयादीगु दु । वय्कलं ७५ प्रतिशत न्हूगु संविधानया मस्यौदा तयार जुइधुंकूगुलिं च्यालाया दुने संविधान निर्माण यायेफइगु धयादिल ।
बुधवाः येँय् जूगु छगू ज्याझ्वलय् न्ववानादिसें वय्कलं संविधान निर्माण यायेगु खँय् प्रधानमन्त्री लगायत नेतात नाप सहलह जुयाच्वंगु धयादिसें राजनीतिक दलत दथुइ सहमति व सहकार्य जुसाः संविधान इलय् हे जारी यायेफइगु धयादिल ।
उखे नेपालगञ्जय् पत्रकार संघं याःगु ज्याझ्वलय् संविधानसभा उपाध्यक्ष पूर्णकुमारी सुवेदीं इलय् हे संविधान निर्माण यायेमफूगुया नैतिक जिम्मेवारी प्रमुख स्वंगू दलं कायेमाःगु व जनता नाप क्षमायाचना यायेमाःगु धयादिल ।
वय्कलं संविधानसभाय् माओवादी दकलय् तःधंगु दल जूगुलिं निर्धारित इलय् संविधान जारी मजूगु जिम्मेवारी माओवादीं कायेमाःगु व आः इलय् संविधान निर्माण यायेत जिम्मेवार जुइमाःगु धयादिल ।<
अथेहे वय्कलं वर्तमान सरकार शान्ति व संविधान निर्माणया निंतिं पूर्ण रुपय् सहजिकरण यायेमफूगु द्वपं बियादिल । वय्कलं सरकारं संविधान निर्माणय् जिम्मेवार जूगु अभिव्यक्ति ब्यूसां नैतिक जिम्मेवारी पूवंकेमफूगु धयादिल ।
