युवा संघं श्रेष्ठया अपहरण माओवादीं याःगु आशंका
नेकपा (एमाले)या भातृ संगठन युवा संघ नेपालं वीपी कोइराला मेमोरियल क्यान्सर अस्पतालया कार्यकारी निर्देशक डा. भक्तमान श्रेष्ठया अपहरणय् उच्च स्तरया व्यवसायिक राजनैतिक शक्तिया संलग्नता दुगु प्रतिवेदन सार्वजनिक या:गु दु ।
झिगुन्हु तक बेपत्ता जुयादीम्ह श्रेष्ठया अवस्था बारे छानबिन यायेत युवा संघं गठन याःगु छानबिन समितिं उगु उच्च राजनैतिक शक्ति माओवादी जुइफुगु आशंका याःगु दु । बुधवाः छानबिन समितिया प्रतिवेदन सार्वजनिक यासें अपहरण घटनाय् उच्च राजनैतिक शक्ति माओवादी जुइफुगु निष्कर्ष पिकागु ख: ।
छानबिन समितिं माओवादीयात आशंकाया घेराय् तःसां पत्रकार सम्मेलनय् युवा संघया नायः महेश बस्नेतं माओवादीं हे अपहरण याःगु दावी यानादिल । वय्कलं माओवादीया नवलपरसी स्थित झयालटुङ डाँडा, चितवनया बेथान स्मृत बिग्रेड व कुलेखानी क्षेत्रय् माओवादीं श्रेष्ठयात अपहरण यानाः तःगु दाबी यानादिल ।
वय्कलं थुकीया बारे थप अनुसन्धान यायेमाःगु खँय् बः बियादिसें जेठ ४ गते अपहरण जूगु अवस्था निसें हे अपहरणकारी व प्रहरी दथुइ खँल्हाबंला जुयाच्वंगु दाबी यानादिल । बस्नेतं थौं सार्वजनिक याःगु प्रतिवेदन संक्षिप्त जक जूगु धयादिसें छुं ईया निंतिं येँय् अध्यान यानाः अपहरण घटनाया बारे पर्दाफास यायेगु धयादिल ।
संघं जेठ २१ गते राजिव पहारीया संयोजकत्वय् न्हाय्म्ह दुजः दुगु छानबिन समिति गठन याःगु खः ।
