कांग्रेस व एमाले पुलांगु हे अडानय्
सत्तारुढ नेपाली कांग्रेस व नेकपा (एमाले) दथुइ राजनीतिक गतिरोध व बजेट अधिवेशनया बारे सहलह यायेत च्वंगु बैठकं न्हापा प्याकेजय् सहमति यायेमाःगु पुलांगु हे अडान काःगु दु । निगू दलं प्याकेजय् सहमति जुइधुंकाः जक राष्ट्रिय सरकार गठन यायेगु निर्णय याःगु दु ।
सिंहदरवार स्थित एमाले संसदीय ज्याकूथीइ च्वंगु बैठकय् माओवादी पाखें स्वंगू बुँदे सहमतिया कार्यान्वयन यायेवं सरकारया राजीनामा वइगु व राष्ट्रिय सरकार गठनया निंतिं लँपु चालीगु खँय् निगू दलया नेतात दथुइ सहलह जूगु खः ।
माओवादीं स्वंगू बुँदे सहमति कार्यान्वयन यायेधुंकाः गठन जुइगु राष्ट्रिय सहमतिय सरकारया बारे नं बैठकय् सहलह जूगु खः । एमाले अध्यक्ष झलनाथ खनालं वर्तमान सरकारं राजीनामा बीगु निश्चित जुइधुंकूगु व न्हूगु सरकार गठनया बारे गृहकार्य आवश्यक जूगु कनादिल ।
बैठकय् न्हूगु आर्थिक दँया बजेटया बारे नं सहलह जूगु ख: । नेतातय्सं माओवादीया नं सहमतिलय् न्हूगु बजेट ह्येमा:गु खँय् ब: ब्यूगु ख: ।
बैठकय् कांग्रेस कार्यवाहक सभापति सुशील कोइराला, वरिष्ठ नेता शेरबहादुर देउवा, संसदीय दलया नेता रामचन्द्र पौडेल व एमाले पाखें अध्यक्ष झलनाथ खनाल, महासचिव इश्वर पोखरेल, स्थायी कमिटी दुजः भरतमोहन अधिकारी लगायतया उपस्थिति दुगु खः ।
