संविधान दयेकेत स्वंगू दलया प्रतिवद्धता
येँ (सन्ध्या टाइम्स)/ संविधानसभाय् दुथ्याःगु मूमू स्वंगू राजनीतिक दलया नेतातय्सं दछिया ई फुइ न्ह्यः हे न्हूगु संविधान दयेकेगु प्रतिवद्धता प्वंकूगु दु। अथे प्रतिबद्धता प्वंकादीपिं नेतात नेकपा (एमाले) या अध्यक्ष झलनाथ खनाल, एकीकृत माओवादीया उपाध्यक्ष नारायणकाजी श्रेष्ठ प्रकाश व नेपाली कांग्रेसया नेता कुलबहादुर गुरुङ खः। थौं सुथय् संविधानसभाया संवैधानिक समितिया मुँज्याय् नीन्यागू हे दलया सभासदतय् न्ह्यःने वय्कःपिंसं उगु प्रतिवद्धता प्वंकादीगु खः ।
थःथःगु नुगःखँ तयेगु झ्वलय् एमालेया अध्यक्ष खनालं न्हापा दलया नेतातय्गु हे कमजोरीं यानाः क्वःछिना तःगु इलय् न्हूगु संविधान जारी याये मफुगु जुयाः हे दछि ई थप यायेमाःगु खः धयादिसें वंगु १४ गते चान्हय् जूगु सहमतियात कार्यान्वयन यानाः राष्ट्रिय सरकार दयेकाः जक न्हूगु संविधान तयार याये फइगु जुयाः उकियात कार्यान्वयनय् बः बीमाः धयादिल ।
अथे हे एकीकृत माओवादीया उपाध्यक्ष प्रकाशं सहमतीय प्रणालीयात त्वःताः बहुमतीय प्रणालीइ वंगुलिं हे समस्या ब्वलंगु खः धयादिसें न्हूगु कथं सहमति यानाः न्ह्याः वनेत माओवादी लचिलो जुइत तयार दु तर व हे लचिलोयात कमजोरीया रुपय् मकायेत इनाप यानादिल ।
उकथं हे नेपाली कांग्रेसया नेता कुलबहादुर गुरुङं गबलय् तक न्हूगु संविधान निर्माण जुइ मखु अबलय् तक न्हियान्हिथं सुथय् ८ ताः इलंनिसें बहनी ८ ताः ई तक च्वनाः ज्या यायेत नं तयार जुइमाः धयादिल ।
