२९ गते बौद्ध संगीत जागरण
येँ (सन्ध्या टाइम्स)/सुभाषित ज्ञानमाला भजन संघ गण महाविहारं थुगुसीया स्वक्वःगु बौद्ध संगीत जागरण ज्याझ्वः याइगु जूगु दु। २५५४ क्वःगु बुद्ध जयन्तिया लसताय् येँया गणबहालय् वइगु जेष्ठ २९ गते उगु ज्याझ्वः यायेत्यंगु खः।
थौं छगू पत्रकार सम्मेलन यानाः स्वक्वःगु बौद्ध संगीत जागरण ज्याझ्वलय् स्वनिगःया स्वीच्यागू ज्ञानमाला भजन खलःपाखें थःथःपिनि सांगीतिक ज्याझ्वः न्ह्यब्वइगु खँ धाःगु दु ।
बौद्ध धर्मयात प्रचार प्रसार यायेगु मू आज्जु तयाः सांगीतिक माध्यमं ज्याझ्वः यात धाःसा अझ अप्वः प्रभावकारी जुइगु नापं संचारमाध्यमं प्रचारप्रसार याकेगु निंतिं हे अथे ज्याझ्वः यायेत्यनागु खँ नं ग्वसाः खलकं धाःगु दु ।
न्हापांगु बौद्ध संगीत जागरण ज्याझ्वः यलया नागबहालय् जूगु खःसा निक्वःगु ज्याझ्वः किपुली जूगु खः ।
