राप्रपा नेपालया आन्दोलन घोषणा
येँ (सन्ध्या टाइम्स)/राष्ट्रिय प्रजातन्त्र पार्टी नेपालं थौं पत्रकार सम्मेलन यानाः आन्दोलन घोषणा याइगु जूगु दु। संवैधानिक राजतन्त्र व धर्म निरपेक्षताया सवालय् जनमत संग्रह यायेमाः धइगु माग यानाः आन्दोलन याना वयाच्वंगु उगु पार्टीं थौं पत्रकार सम्मेलनया माध्यमं खुला तक न्ह्याइगु आन्दोलन ज्याझ्वः घोषणा याइगु खँ धाःगु दु ।
छुं दिं न्ह्यवंनिसें मदिक्क हे राप्रपा नेपालया केन्द्रीय कमिटीया मुँज्या च्वना वयाच्वंगु खःसा थौं उगु मुँज्या क्वचायेकाः आन्दोलनया घोषणा यायेत्यंगु खः। राप्रपा नेपालं राष्ट्रियताया सवालयात कयाः एजेण्डा दयेकाः आन्दोलनया ज्याझ्वः घोषणा याइगु खँ उगु पार्टीया छम्ह नेतां धयादीगु दु। थौं सनिलय् पार्टीया नायः कमल थापां आःया अवस्थाय् थःपिनिगु भूमिका, पार्टीया अवधारणा नापं आन्दोलनया ज्याझ्वः तकं सार्वजनिक यानादी ।
लुमंकेबहः जू संविधानसभाया म्याद थप याये मजिउ धकाः सः तया वयाच्वंगु राप्रपा नेपालं संविधानसभाया म्याद थपया विपक्षय् मत तःगु खः ।
