नेक्रायुसंघ ख्वपया नगर सम्मेलन
ख्वप (सन्ध्या टाइम्स)/नेपाल क्रान्तिकारी युवा संघ ख्वप नगर समितिया न्हय्क्वःगु नगर सम्मेलन नेमकिपाया केन्द्रीय दुजः व नेक्रायुवा संघया अध्यक्ष जग्यबहादुर शाहीं उलेज्या यानादिल। अरनिको सभाभवन् जूगु उगु ज्याझ्वलय् वयक्लं देशय् पूँजीवादी व्यवस्था पुनर्स्थापना लिसें माओवादीया वाइसीएल नापं कांग्रेसया तरुण दल व एमालेया युथ फोर्स नं उच्छृङखल जुयावःगुलिं हे स्वंगू दल दथुया ३ बुँदे सहमति कार्यान्वयन मजुयाच्वंगु खः धयादिल ।
न्हय्क्वःगु नगर सम्मेलन तयारी समितिया संयोजक शिवप्रसाद बालाया सभापतित्वय् जूगु ज्याझ्वलय् नेमकिपा ख्वप नगर समितिया अध्यक्ष रविन्द्र खर्बुजा, नेक्राशिसंघ ख्वप नगर समितिया अध्यक्ष लक्ष्मीनारायण दुवाल, नेक्रायुसंघ ख्वप जिल्ला अध्यक्ष रामकृष्ण प्रजापति, किसान संघया पृथुकुमार प्रजापति, महिला संघया रोशनी मैंया सुवाल, विद्यार्थी संघया रामेश्वर मचामसी व नेक्रायु संघ मध्यपुरया अध्यक्ष सुरेन्द्र था श्रेष्ठं भिंतुना बियादीगु खः। सम्मेलनं राजेन्द्र सुवालया अध्यक्षताय् न्हूगु नगर समिति ल्यःगु दु ।
