'श्रेष्ठया अपहरण आर्थिक कालाबिला विवादया कारणं'
गृहमन्त्री भीम रावलं वीपी कोइराला क्यान्सर मेमोरियल अस्पतालया कार्यकारी निर्देशक डा. भक्तमान श्रेष्ठया अपहरण आर्थिक कालाबिला विवादया कारणं जूगु खँ धयादीगु दु ।
मंगलवाः रिपोटर्स क्लबय् छगू साक्षात्कर ज्याझ्वलय् वय्कलं अपहरणया बारे छानबिन पुचलं प्रतिवेदन लःल्हायेधुंकूगु धयादिसें श्रेष्ठया अपहरण नापं संचार उद्यमी जमिम शाह, अरुण सिंघानिया हत्याकाण्डय् नं आर्थिक कालाबिलाया विवाद खनेदुगु धयादिल ।
वय्कलं घटना सुनां यात धइगु बारे सरकार सतिक थ्यंगु धयादिसें छुं दिंया दुने हे श्रेष्ठया अपहरण सुनां व छाय् यात धइगु बारे सार्वजनिक यायेगु धयादिल । वय्कलं श्रेष्ठयात अपहरण या:गु धाःगु हिन्दूवादी दलया बोर नं सरकारं अनुसन्धान यानाच्वंगु धयादिल । वय्कलं राज्यया दबावया कारणं डाक्टर श्रेष्ठयात अपहरणकारीतय्सं सकुशल मुक्त याःगु दाबी यानादिल । थुगु घटनाय् माओवादीया संलग्नता दुगु वा मदुगु बारे धा:सा वय्कलं छुं नं धयामदी ।
मेगू छगू प्रशंगय् गृहमन्त्री रावलं माओवादीं सहमति कार्यान्वयन याःसा प्रधानमन्त्री राजीनामा बीत तयार दुगु धयादिल । वय्कलं जेठ १४ गते प्रमुख स्वंगू दलत दथुइ जूगु सहमति पूवंकेत सरकार तयार जूगु धयादिसें वस्वयां न्ह्यः माओवादीं न्हापा याःगु सहमतित पूवंकेमाःगु धयादिल ।
