संक्रमणकालय् अप्व वन विनास : राष्ट्रपति
राष्ट्रपति डा. रामवरण यादवं संक्रमणकालीन अवस्थाय् वन विनास अप्वःगु बारे दक्वं सचेत जुइमाःगु खँ धयादीगु दु ।
सामुदायिक वन उपभोक्ता महासंघ नेपालया प्यक्वःगु महाधिवेशनया मंगलवाः येँय् उल्लेज्या यानादिसें राष्ट्रपति यादवं नेपालय् वंगु खुइदँय् राजनीतिक धार स्थापित नं यायेमफूगु व वनजंगल नं बचे यायेमफूगु धयादिसें संक्रमणकालीन अवस्थाय् वन विनास जुइगु खँ पाखें झीसं स्यनाकायेमाःगु धयादिल ।
वय्कलं धयादिल, 'सत्ता परिवर्तन व देय्या संक्रमणकालीन अवस्थाय् वन पैदावार विनास जुइगु न्हापाया अनुभव पाखें झीसं स्यनाकायेमाः ।'
वय्कलं वन, वनस्पति व लया मुहान थंज्या:गु प्राकृतिक स्रोत साधनयात भावी पुस्ताया नासो लुमंका जगेर्ना यायेमाःगु झी दक्वसियां दायित्व जूगु धयादिसें नीद्वः सामुदायिक वनं पर्यावरण जोगे यायेत महत्वपूर्ण योगदान यानाच्वंगु धयादिल ।
सामुदायिक वनया उपभोक्ता व संचालकत अव्याच्वंगुलिं थुगु क्षेत्रय् खराव प्रवृत्तिया मनूत नं दुहांवयेफुगु व उकीं वन विनास जुइगु सम्भावना प्रति सचेत जुइत महासंघयात सुझाव बियादिल । वय्कलं फि व गिट्टी निकासीया नांमय् चुरेक्षेत्रया विनास जुयाच्वंगु प्रति दुःख नं प्वंकादिल ।
