बजेट अधिवेशनया बारे सभामुख व प्रचण्ड दथुइ सहलह
सभामुख सुवासचन्द्र नेम्वाङं बेजट अधिवेशन न्ह्याकेगु बारे प्रमुख विपक्षी दल एनेकपा (माओवादी)या अध्यक्ष पुष्पकमल दाहाल 'प्रचण्ड' नाप सहलह यानादीगु दु । मंगलवाः सुथय् प्रचण्ड निवास न्हू बजारय् थ्यंकाः नेम्वाङं दलत दथुइ सहमति कार्यान्वयन मजूगुलिं बजेट अधिवेशन प्रभावित जूगु धयादिल ।
वय्कलं सरकारं असार २ गते नीतिक व ज्याझ्वः न्ह्यब्वयेगु व २५ गते बजेट न्ह्यब्वयेगु तयारी यानाच्वंसां दलत दथुइ सहमति कार्यान्वयन मजूगुलिं बजेट अधिवेशन प्रभावित जूगु व थुकीं अधिवेशन गुवलय् च्वनीगु बारे निर्णय यायेमफूगु धयादिल ।
सहलह लिपा पत्रकारत नाप खँल्हाबंला यानादिसें वय्कलं बजेट अधिवेशन प्रभावित जूगुलिं सहमतिया कार्यान्वयन यायेगु आधारत याकनं क्वःछीत थम्हं प्रचण्डयात इनाप यानागु कनादिल ।
खँल्हाबंलाय् प्रचण्डं दलत दथुइ सहमतिया निंतिं कुतः जुयाच्वंगु व सहमति पाखें हे गतिरोध ज्यंकेत थःपिं गम्भीर जुया लगेजुयाच्वंगु खँ धयादीगु खः ।
