थैवया हत्या विरुद्ध थीथी थासय् प्रदर्शन
बुधवाः बुटवलय् हत्या जुम्ह एमाले समर्थित युथ फोस्रया कार्यकर्ता प्रचण्ड थैवया हत्यारायात ज्वनेमाःगु व हत्याया निष्पक्ष छानविन यायेमाःगु माग यासें एमालें शनिवाः देया थीथी थास् विरोध प्रदर्शन व सभा यात ।
रुपन्देहीलय् जूगु शवयात्रायात संवोधन यासें एमाले महासचिव झलनाथ खनालं थःगु पार्टीं हत्याराया नां तकं सार्वजनिक यायेधुंकूगुलिं सरकारं हत्यारायात कारबाही मयासाः एमालें सरकार त्वतिगु चेतावनी बियादिल । वय्कलं जनमुक्ति सेनाया शिविर अपराधीतय् आश्रय स्थाल मखु धकाः पुष्टि यायेत माओवादीयात चुनौति तकं बियादीगु दु । वय्कलं एमाले लोकतान्त्रिक शक्तित नाप सहकार्य यायेत तयार दुगु खँ कनादिल ।
शवयात्राय् एमालेया अध्यक्ष झलनाथ खनाल, महासचिव ईश्वर पोखरेल, सचिव बिष्णु पौडेल नापं द्वलंद्व मनूतय्सं ब्वति काःगु खः । शवयात्राया झ्वलय् एमाले व माओवादी कार्यकर्ता दथुइ आप्पां कायेकीगु ज्याः जुया स्थिति तनावपूर्ण जूगु खः । अन्त्येष्टि सिधेवं जिल्ला प्रशासनं अन हाकनं कफ्यू आदेश जारी याःगु दु ।
अथेहे थैवया हत्याया विरोधय् येँ नं विरोध जुलुस व सभा जुल । रत्नपार्कं शुरु जूगु विरोध जुलुस न्हू सतक जुया हाकनं रत्नपार्कय् तुं वयाः सभाय् हिउगु खः ।
रुपन्देहीया थैव बुधवाः बहनी छेँ वनाच्वंगु इलय् मोटरसाइकलय् विपिं अज्ञात पुलचं गोलिं कायेका हत्या याःगु खः । एमालें धासाः हत्या माओवादीया रुपन्देही जिल्ला अध्यक्ष सुजीत विक व वया पुचलं याःगु द्वपं बियाच्वंगु दु ।
