येँया बसुन्धराय् कारबम बिस्फोट

येँया बसुन्धराय् कारय् तयातःगु शक्तिशाली बम विस्फोटय् लाना प्यम्ह घाःपाः जूगु दु । थौं सुथय् न्ह्यता ई जुया झिंन्यागू मिनेटय् बसुन्धरास्थित इशान बाल अस्पताल न्ह्यःने सतकय् दिकातःगु बा. ७. च. ५५३९ नम्बरया निजी कार दुने तयातःगु सकेट बम विस्फोट जूगु खः । विस्फोटय् लाना प्यम्ह घाःपाः जूगु दु । घाःपाः जूपिं पोटन ठाकुर, भरत केसी, नयन प्रसाद सुवेदी व सोमनाथ महतो खः । विस्फोटं कार पूर्णरुपय् ध्वस्त जूगु दु । विस्फोटलिपा च्याःगु मि सुरक्षाकर्मी व दमकलया ग्वाहालिं स्याःगु खः । घटनास्थलय् पड्केमजूगु अवस्थाय् लूगु सकेट बम धाःसा नेपाली सेनाया बम डिस्पोजल टोलीं निष्क्रिय याःगु खः । प्रहरीं कारदुने नीगू नीगू लिटरया निगः जर्किनय् पेट्रोल दुगु अनुमान याःगु दु । बम विस्फोटं बसुन्धरा क्षेत्र छुं ई आतंकित जूगु खः । बम विस्फोटं जःखःया छुं छेँया झ्यालय् न्ह्यायेकं तज्यागु दु । कार रानीबारीया रामबहादुर अधिकारीया जूगु प्रहरीं धाःगु दु । अखिल नेपाल ट्रेड युनियन महासंघ ट्याक्सी स्वरोजगार समितिया दांभरि तकं जुयादीम्ह अधिकारीं छुं दिं न्ह्यः जक कार न्यानादीगु खः । घटनाबारे अनुसन्धानया नितिं प्रहरीं चालक दीपक विश्वकर्मा नापं नविन विष्ट व राजु खत्रीयात ज्वंगु दु । विष्फोटया जिम्मा पालंपाः नेपाल स्वतन्त्र दल व राजन मुक्ति मोर्चां काःगु दु । संविधानसभाया म्याद तंगु धासें बम विष्फोट यानागु नेपाल स्वतन्त्र दलं दाबी याःगु दु ।