सहमति कार्यान्वयनय् कांग्रेस बाधक : यादव
मधेशी जनअधिकार फोरमया अध्यक्ष उपेन्द्र यादवं जेठ १४ गते स्वंगू दलत दथुइ जूगु सहमति कार्यान्वयन यायेत कांग्रेस बाधक जूगु द्वपं बियादीगु दु ।
सुनसरीलय् सोमवाः पत्रकारत नाप खँल्हाबंला यानादिसें वय्कलं प्रधानमन्त्री माधवकुमार नेपालं न्यान्हु दुने राजीनामा यायेगु धका: जूगु सहमतियात कांग्रेसं कार्यान्वयन यायेमब्यूगु धयादिल । कांग्रेसं सहमति प्रति बेइमानी यासें प्रधानमन्त्रीयात राजीनामा याकेमब्युगु धयादिसें वय्कलं कांग्रेस वर्तमान सरकार बचे यानाः फाइदा दक्वं थम्हं कायेत स्वयाच्वंगु धयादिल ।
राजनीतिक दलत दथुइ सहमतिया निंतिं प्रधानमन्त्रीया राजीनामा बाहेक मेगू विकल्प मदुगु धयादिसें वय्कलं प्रधानमन्त्रीं राजीनामा मब्यूसाः राष्ट्रिय सहमति जुइमफइगु दाबी यानादिल । न्यान्हुया दुने प्रधानमन्त्रीं राजीनामा यायेगु धका: जूगु सहमतिया बारे दलतय्सं थःथःगु तरिकां व्याख्या याःसा व राजनीतिक बेइमानी जुइगु धयादिल ।
