'माओवादीं भक्तमानया अपहरण'
चितवनया भरतपुरय् च्वंगु वीपी कोइराला मेमोरियल अस्पतालया कार्यकारी निर्देशक डा. भक्तमान श्रेष्ठयात एनेकपा (माओवादीं) अपहरण याःगु द्वपं हिन्दू प्रजातान्त्रिक पार्टीं ब्यूगु दु ।
सोमवाः पार्टी अध्यक्ष विष्णुकुमार प्रसाँई छगू विज्ञप्ति पिथंसें हिन्दूया नांमय् अस्तित्वय् दुगु थःगु जक पार्टी जूगु धासें श्रेष्ठया अपहरणय् हिन्दूवादी पार्टीया संलग्नता दुगु धकाः हिन्दूतय्त बदनाम यायेत स्वःगु द्वपं ब्यूगु दु । विज्ञप्तिइ अपहरणय् हिन्दू पार्टीया नां ब्यूगु प्रति आपत्ति प्वंकातःगु दु ।
विज्ञप्तिइ हिन्दू समुदाययात बदनाम यायेत इसाइ मिसनया निर्देशनय् युरोपियन युनियनया नं संलग्नताय् माओवादीं अपहरण याःगु दाबी यानातःगु दु । अथेहे अपहरण याःगु थासय् सेनात दुगु धाःगु खँ भ्रामक व नियोजित जूगु धासें अथे खःसा डाक्टरयात माओवादी लडाकु शिविरय् यंकूगु जुइमाःगु खँ विज्ञप्तिइ न्ह्यथंनातःगु दु ।
