नेपाली भाषीतय्गु म्वाये दइगु अधिकार ग्यारेण्टी या : वाईसीएल
एकीकृत नेकपा (माओवादी)या भातृ संगठन वाईसीएलं भारतया मेघालयलय् नेपालीभाषीतय्त जुयाच्वंगु ज्यादतिया विरोध याःगु दु ।
सोमवाः भारतीय राजदूतावासय् ज्ञापनपत्र लःल्हासें वाईसीएलं मेघालयलय् नेपालीभाषीतय्त उच्शृंखल पुचलं यानाच्वंगु ज्यादती, आगजनी, बर्बरता, हत्या व लुटपाटया घटनाय् झिंगुम्ह नेपालीभाषीत सीगु खँ न्ह्यथंसें सलंस दँ न्ह्यः निसें च्वनावयाच्वंपिं नेपालीभाषीतय्त क्रुरतापूर्वक स्याःगु घटनाया घोर भर्त्सना यानात:गु दु ।
वाईसीएलया अध्यक्ष गणेशमान पुनया नेतृत्वय् वंगु पुचलं लःल्हाःगु ज्ञापनपत्रय् नेपालीभाषीतय्त सम्मानपूर्वक म्वाये दइगु अधिकारया ग्यारेण्टी यायेत माग यानातःगु दु । जातीय व भाषिक सद्भाव कायम यायेत, अन्ययालय् लाःपिं नेपालीभाषीतय्त न्यायोचित क्षतिपूर्ति सहित घाःपा जूपिंत निशुल्क वासः याकेगु व्यवस्था यायेत व दोषीयात कारवाही यायेत नं माग यानात:गु दु ।
अथेहे ज्ञापनपत्रय् नेपाली जनता व नेपालया पाखें नेपालीभाषीतय्त जुयाच्वंगु ज्यादतीया बारे भारतीय पक्षया ध्यानाकर्षण याःगु इलय् भारतया आन्तरिक मामिलाय् न्वमवायेत, टिप्पणी मयायेत नेपाःमितय्त ब्यूगु ख्याच्वः प्रति वाईसीएलं खेद प्वंकूगु दु ।
ज्ञापनपत्रय् भारत नाप स्वाःगु नेपाःया थीथी सीमा क्षेत्रय् भारतं याःगु भूमि अतिक्रमण व सीमावर्ती क्षेत्रय् भारतीय सीमा वलया गतिविधि प्रति विरोध प्वंकूसें भारत सरकारयात नेपाःया आन्तरिक मामिलाय् हस्तक्षेप मयायेत इनाप यानातःगु दु ।
