'संविधान च्वयेत लिबागुया जिम्मेवार प्रमुख स्वंगू दल'
चीचीधंगु दलतय्सं शान्ति प्रकृया व संविधान निर्माण यायेगु ज्या लिबानाच्वंगुया मू जिम्मेवार प्रमुख स्वंगू दल जूगु खँ धाःगु दु ।
सोमवाः च्वंगु संविधानसभा अन्तर्गतया संवैधानिक समितिया बैठकय् तःधंगु दलतय्त सत्ता प्राप्तिया निंतिं मखसें संविधान निर्माण यायेगु ज्याय् लगे जुइत चीचीधंगु दलया नेतातय्सं इनाप याःगु दु । जेठ १४ गते बहनी जूगु सहमतिया बारे स्वंगू दलतय्सं थःथःगु तरिकां व्याख्या यानाच्वंसा दच्छिया दुने नं संविधान निर्माण मजुइगु खँय् च्यूताः प्वंकूसें प्रमुख स्वंगू दलयात सरकार क्वथलेगु व गठन यायेगु कासाय् लगे मजुइत उमिसं इनाप याःगु दु ।
बैठकय् तराई मधेश लोकतान्त्रिक पार्टीया हृदेश त्रिपाठी, राष्ट्रिय प्रजातन्त्र पार्टीया लोकेन्द्रबहादुर चन्द, राष्ट्रिय जनशक्ति पार्टीया डा. प्रकाशचन्द्र लोहनी, नेपाः राष्ट्रिय पार्टीया बुद्ध साय्मी, राष्ट्रिय जनमोर्चाया चित्रबहादुर केसी लगायतं दलत दथुइ जुयाच्वंगु असहमतियात याकनं चीकाः संविधान निर्माण यायेगु ज्याय् न्ह्याः वनेमागु बिचाः प्वंकूगु खः ।
