प्रधानमन्त्रीया कारणं राजनीतिक संकट : भट्टराई
एनेकपा (माओवादी)या उपाध्यक्ष डा. बाबुराम भट्टराईं प्रधानमन्त्री माधवकुमार नेपालं देय्या राजनीतिक समस्यायात झन संकटय् यंकाच्वंगु द्वपं बियादीगु दु । वय्कलं प्रधानमन्त्री नेपालं राजीनामा मब्यूतल्ले राजनीतिक समस्या मज्यनीगु दाबी नं यानादिल ।
संवैधानिक समितिया सोमवाः जूगु बैठक लिपा पत्रकारत नाप खँल्हाबंला यानादिसें भट्टराईं राजनीतिक अवस्था संकटय् लानाच्वंसां प्रधानमन्त्री राजीनामा मब्यूगु प्रति आश्चर्य प्वंकादिल । वय्कलं जेठ १४ गते प्रमुख स्वंगू दलत दथुइ जूगु सहमतिलय् प्रधानमन्त्रीं अविलम्ब राजीनामा बीगु धकाः च्वयातःसां उकीया झिंछन्हु दयेधुंकाः नं प्रधानमन्त्रीं राजीनामा मब्यूगु धयादिल ।
वय्कलं प्रधानमन्त्री थंज्याःम्ह व्यक्तिं राजनीतिक मूल्य मान्यतायात ध्यानय् तयाः सहमति कथं राजीनामा बीत इनाप यानादिल । वय्कलं माओवादी जेठ १४ गते जूगु स्वंगू बुँदे सहमति कार्यान्वयन जुइमाः धइगु पक्षय् दुगु नं धयादिल ।
आः हे पार्टी दुने न्हुम्ह प्रधानमन्त्रीया निंतिं सहलह मन्ह्याःगु धयादिसें भट्टराईं न्हूगु सरकार गठन जुइगु इलय् सरकारया नेतृत्व बारे पार्टी दुने पाखें विकल्प मालेफइगु धयादिल । अथेहे मेगू छगू प्रशंगय् वय्कलं बजेट अधिवेशनय् माओवादीं अवरोध यायेगु बारे पार्टी दुने छुं नं सहलह मजूगु धयादिल ।
