कांग्रेस-एमाले सहमतिया बाधक मखु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' जेठ १४ गते बहनी प्रमुख स्वंगू दलत दथुइ जूगु सहमतिया बाधक कांग्रेस व एमाले मखसें मेगू हे शक्ति जूगु खँ धयादीगु दु । सोमवाः सिन्धुपाल्चोक पाखें येँ लिहांवयेगु झ्वलय् प्रचण्डं स्थानीय पत्रकारत नाप खँल्हाबंला यानादिसें सहमतिया बाधक मेगू हे शक्ति जूगु धाःसां व सुख धकाः प्रष्ट धाःसा यानामदी ।
आइतवाः सनिलय् सिन्धुपाल्चोकया पश्चिमी क्षेत्रस्थित पाल्चोक गाविसया ककनी थ्यंदीम्ह प्रचण्ड सरकारया पाखें खबर वःगु धासें सोमवाः सुथय् येँय् लिहांझायादीगु खः । येँय् लिहांवये न्ह्यः वय्कलं राजनीतिक निकास पिहांवइगु संकेत वःगु धयादिल । वय्कलं सरकारया पाखें सःतुगु धयादिसें समस्याया निकास पिहांवइगु सम्भावना दुगु धयादिल ।
थ्वस्वयां न्ह्यः आइतवाः बहनी कार्यकर्तातय्त गोप्य प्रशिक्षण बियादिसें प्रचण्डं आन्दोलन लिपा माओवादी झन बल्लागु दाबी यानादिसें कार्यकर्ता परिचालन यायेगु ज्याझ्वः याकनं हे ह्येगु खँ धयादीगु खः ।
माओवादी अध्यक्ष प्रचण्ड थः जहान सीता, काय् प्रकाश, कान्छी म्हाय्, पोलिटब्यूरो दुजः अग्नी सापकोटा सहित म्हिग उखे पाखे झायादीगु खः ।
