निम्ह सैनिक अधिकृतय्त कारवाही
नेपाली सेनां आइतवाः निम्ह सैनिक अधिकृतय्त कारवाही याःगु दु । नेपाली सेनाया समरी जनरल सैनिक अदालतं सोह्रखुट्टे स्थित महानगरिय प्रहरी प्रभागय् वंगु वैशाष ५ गते याःगु घटनाय् दोषी ठहर यासें निम्ह अधिकृतय्त कारवाही याःगु ख: ।
सैनिक जनसम्पर्क निर्देशनालयं आइतवाः छगू विज्ञप्ति पिथंसें उगु घटनाय् अनुशासन व आचरण सम्बन्धी कसुरया दोषी खनेदुगुलिं सेनानी सञ्जयजंग रायमाझीयात दच्छि बढुवा रोक्का व सेनानी राजेश विक्रम शाहीयात नसिहत बीगु फैसला याःगु खँ न्हथनात:गु दु ।
उगु घटनाया सम्बन्धय् सत्यतथ्य छानवीन यायेत गठित कोर्ट अफ इन्क्वायरी (छानबिन समिति)या सिफारिशया आधारय् घटनाय् संलग्न निम्ह सैनिक अधिकृतय्त कारवाही याःगु खँ विज्ञप्ति न्ह्यथनातःगु दु ।
वंगु वैशाष ४ गते बहनी पार्टीं लिहांवयाच्वंगु इलय् रायमाझी व शाहीं प्रहरीयात दुर्व्यवहार यायेवं उमित प्रहरीं ज्वंगु खः । कन्हय् कुन्हु उकीया विरोधय् निम्ह सैनिकतय्सं थप सैनिकतय् ग्वाहालिइ सोह्रखुट्टे प्रहरी चौकी घेराउ यानाः उगु चौकीया प्रमुखयात ख्याच्वः नं ब्यूगु खः ।
