अपहरण बारे माओवादीं भण्डाफोर याइगु
वीपी कोइराला मेमोरियल क्यान्सर अस्पतालया कार्यकारी निर्देशक डा. भक्तमान श्रेष्ठया अपहरणया बारे एकीकृत नेकपा (माओवादीं) भण्डाफोर यायेगु निर्णय याःगु दु ।
झिंगुन्हु तक अपहरणय् लानादीम्ह श्रेष्ठया अवस्था छानबिन यायेत माओवादीं अमिक शेरचनया नेतृत्वय् गठन याःगु छानबिन समितिया प्रतिवेदन अध्ययन लिपा आइतवा: च्वंगु पार्टी पदाधिकारीतय् बैठकं श्रेष्ठया अपहरणय् पार्टीयात षड्यन्त्रमूलक ढंगं सालेगु ज्या जूगु निष्कर्ष पिकासें उकीया भण्डाफोर यायेगु निर्णय याःगु खः । बैठकं अपहरणया सम्बन्धय् प्रधानमन्त्री ब्यूगु अभिव्यत्ति गैर जिम्मेवार व आपत्तिजनक जूगु खँ नं धाःगु दु ।
अथेहे बैठकं वृहत शान्ति सम्झौता विरुद्ध नेपाली सेनां न्हूगु भर्ना चायेकूगु बारे सरकार व सुरक्षा निकाय नाप सहलह यायेगु निर्णय याःगु दु । माओवादीं न्हूगु भर्ना चायेकूगु बारे शनिवाः हे आपत्ति प्वंकेधुकूगु दु ।
अथेहे बैठकय् बजेट अधिवेशनय् पार्टीया भूमिका व राजनीतिक दलत नाप सहमति कार्यान्वयनया निंतिं जुयाच्वंगु सहमतिया कुतःया बारे नं सहलह जूगु ख: ।
