नेवाः तःखँग्वः धुकू पिदनीगु

येँ (सन्ध्या टाइम्स)/ नेपालभाषा आकादेमिं पिथनीगु नेपालभाषा तःखँग्वः धुकू वइगु शुक्रवाः पिदनीगु जूगु दु। दाता भुवनेश्वर अमात्यया लुमन्तिइ लामु अमात्यया ग्वाहालिं आकादेमिपाखें पिथनेत्यंगु उगु सफूधुकुती ३२ हजार खँग्वः दुथ्याःगु खँ सम्पादक इन्द्र मालीं कनादीगु दु ।

संस्कृतिविद् सत्यमोहन जोशीं पिथनादीगु खँग्वः धुकूया परिस्कृत, परिमार्जित नापं न्हूगु संस्करण कथं पिदनीगु उगु खँग्वःधुकू थ्यंमथ्यं ६८८ पेज दइ। थुगु नेपालभाषा तःखँग्वः धुकुती अप्वः यानाः नेवाःतय्सं छ्यला वयाच्वंगु व्यवहारिक खँग्वः नापं संस्कृति नाप स्वापू दुगु खँग्वःत अप्वः दुथ्याःगु जानकारी नं सम्पादक मालीं बियादीगु दु ।