प्रधानमन्त्री युरोप प्रस्थान
प्रधानमन्त्री पुष्पकमल दहाल 'प्रचण्ड' छवाःया निंतिं शनिवाः युरोप भ्रमणय् झायादीगु दु । सनिलय् न्याताः ईलय् वय्क त्रिभुवन अन्तराष्ट्रिय विमानस्थलं प्रस्थान यानादीगु खः । युरोप भ्रमणया झ्वलय् प्रम प्रचण्डं नर्वे व फिनल्याण्डया भ्रमण यानादी ।
विमानस्थलय् पत्रकारतलिसे खँल्हानादीसें वयेकलं फिनल्याण्ड सरकारनाप वन व नर्वे सरकार नाप विद्युतया बिषयलय् छलफल जुइगु खँ कनादिल । बिदाइ समारोहलय् मन्त्री, एकीकृत (माओवादी) पार्टीया नेता, सुरक्षा अङ्गया प्रमुख, कुटनीतिक नियोगया पदाधिकारी नापं सरकारी कर्मचारीतय् उपस्थिति दुगु खः ।
वय्कया भ्रमण पुचलय् सरकारी कर्मचारी व व्यापारीत नापं याना झिंगुम्ह दुथ्या । प्रतिनिधिमण्डलय् वय्कया जहान मय्जू सीता पौडेल, काय् प्रकाश दहाल, प्रधानमन्त्रीया सल्हाकार हरि बहादुर थापा, मुख्य सचिव भोजराज घिमिरे, नेपाल उद्योग वाणिज्य महासंघया अध्यक्ष कुश कुमार जोशी, उद्योगपति चण्डिराज ढकाल, अन आर अनया उपेन्द्र महत्तो आदि दुथ्या ।
प्रधानमन्त्रीं नर्वेय्लय् अनया जुजु व वय्कया समकक्षियात नापलानादीगु ग्वसाः दुसाः फिनल्याण्डय् अनया राष्ट्रपतियात नापलय्गु ग्वसाः दु । अथेहे वय्कलं थःगु युरोप भ्रमणया झ्वलय् अनया थीथी कथंया उर्जा शक्तिया बारे जानकारी कयादीगु योजन दु ।
थःगु छवाःयंकया भ्रमण क्वचाय्का वय्क ४ अप्रिलय् नेपाः लिहांझायादी ।
