आः २५ दलया हे ल्हाःचिं दयेमाः: चीधंगु दल
येँ (सन्ध्या टाइम्स)/स्वंगू दल दथुइ जूगु स्वंगू बुँदाया सहमतियात कयाः एकीकृत माओवादी व कांग्रेस एमालें थःथःगु कथं ब्याख्या यानाः राजनीतिक गतिरोध अन्त्य याये मफुगु नापं हाकनं स्वंगू दलया दथुइ कचमच जूगुलिं आवंलि सहमति जुइगु इलय् संविधानसभाय् दुथ्याःगु २५ दलया हे ल्हाःचिं तयाः सहमति यायेमाः धकाः चिचीधंगु दलया नेतातय्सं माग याना हःगु दु ।
वर्तमान सरकारय् दुथ्याःगु नेकपा (संयुक्त)या नायः चन्द्रदेव जोशीं 'सन्ध्या टाइम्स' लिसे खँ ल्हासें आः चिचीधंगु दलतय्सं सहमतिया इलय् थःपिं नं दयेमाःगु नापं सहमतिया पतिइ ५ दलया हे प्रतिनिधितय् ल्हाःचिं दयेमाः धकाः ततःधंगु दलया नेतातय्त धाये धुन धकाः कनादीगु दु ।
आःया अवस्थाय् छखे नेपाली कांग्रेस व एमाले मेखे एकीकृत माओवादी निगू धुरब जुयाः न्ह्याः वनाच्वंगु दु धासें वय्कलं आःया अवस्थाय् चिचीधंगु दल धइगु स्वंगूगु विकल्प कथं मध्यमार्गी लँ ज्वनाः न्ह्याः वनाच्वनागु नापं सहमति, सहकार्य व निकासया नितिं कुतः यानाच्वनागु दु धकाः नं धयादिल। सहमतिया निंतिं थःपिंसं सरकारय् दुथ्याःगु व दुमथ्याःगु खँयात ध्यानय् मतसे चिचीधंगु दलतपाखें कुतः यानाः ततःधंगु दलया नेतातलिसे सहलह ब्याकाच्वनागु खँ नं नेता जोशीं धयादिल ।
लिपांगु इलय् वयाः नेपाली राजनीतिइ विदेशीतय्गु दवाव माक्व स्वयां नं अप्वयावःगुलिं समस्या वःगु खः धकाः स्वीकार यासें नेता जोशीं अथे विदेशीतय्गु दबाव अप्वयेकेगु ज्यायात ततःधंगु दलतपाखें हे प्रोत्साहन जूगु खः धकाः नं दावी यानादिल ।
