डा. श्रेष्ठ त्वःतलं नं रहस्यमय
येँ (सन्ध्या टाइम्स)/अपहरणय् लाःम्ह वीपी क्यान्सर अस्पतालया कार्यकारी निर्देशक डा. भक्तमान श्रेष्ठ झिंगुन्हु लिपा मुक्त जुयाः म्हिगः छेँजःया सम्पर्कय् वःसां वय्कःया अपहरण धाःसा अझ नं रहस्यमय हे जुयाच्वंगु खँ सीदुगु दु। वय्कःयात नेपाल हिन्दु जनता पार्टीं अपहरण याःगु खः धाःसां उमिसं छाय् अपहरण याःगु खः, छु कारणं त्वःता हल व उमि दथुइ छु खँ ब्यात धइगु खँ धाःसा आः तक पिहां मवःनि ।
लिसें वय्कलं धयादी थेंज्याःगु पार्टी धाःसा आः तक अस्तित्वय् हे मदुगु खँ नं धाःगु दु। उमिसं थःगु पार्टीया प्रचार यायेगु लागिं जक वय्कःया अपहरण यानागु खः धाःसां उगु पार्टीं धाःसा थ्व विषयय् आः तक वक्तव्य छगू तक नं पिकाःगु मदुनि ।
वय्कःयात अपहरण यायेगु ज्याय् माओवादीया नं ल्हाः दु धकाः चर्चा वयाच्वंसां माओवादीपाखें आः तक थुकिया बारे छुं न्ववाःगु मदुनि। लिसें माओवादीं डा. श्रेष्ठयात मालेगु लागिं गठन याःगु समितिया संयोजक अमिक शेरचनं नं छुं धयादीगु मदुनि। डा. श्रेष्ठं थः पासापिंत थःत अपहरण याःपिं मनूतय्सं थवंथवय् खँ ल्हाइबलय् छ्यलीगु खँग्वः धाःसा वामपन्थी पहः वः धकाः कनादीगु खँ नं छगू सूत्रं धाःगु दु। अपहरणकारीतय्सं वय्कःयात माःगु माइग्रेनया वासः तकं न्यानाः नके हःगु खः ।
