टेबुल टेनिस कासामिपिं भारतपाखे
येँ (सन्ध्या टाइम्स)/ नेपाःया टेबल टेनिस कासामिपिनि छगू पुचः भारत वंगु दु। भारतया देहरादूनय् जुइगु दक्षिण एशियाली जुनियर टेबल टेनिस च्याम्पियन्सशीपय् ब्वति कायेगु निंतिं नेपाःया झिंस्वम्हेसिया छगू पुचः उखेपाखे वंगु खः ।
मोरङ जिल्ला टेबुल टेनिस संघया सचिव विकेन थापाया नेतृत्वय् वंगु नेपाःया कासामितय् पुचलय् मिजंतय्पाखे अनिश श्रेष्ठ, विवेक गौतम, सुजन थपलिया, मणिकुमार लामा, सोनु गुप्ता व मिसातय्पाखे एलिना महर्जन, रेनुका खत्री, अपेक्षा शाक्य, रेश्मा रसाइली व काजोल रौनियारपिं दुथ्याः ।
अथे हे कासाय् निर्णायकया रुपय् विनोद शाक्य नं उखेपाखे वंगु दु। कासाय् ब्वति कायेगु निंतिं राष्ट्रिय खेलकुद परिषद् व नेपाल ओलम्पिक कमिटी आर्थिक ग्वाहालिया लिसें कासामिपिंत माःगु कासा ज्वलंत ग्वाहालि कथं बिउगु संघं जानकारी बिउगु दु। अथे हे संघपाखें नीगू थान रबर व टीशर्ट कासामिपिंत उपलब्ध याकूगु खः ।
कासामिपिंत राष्ट्रिय खेलकूद परिषद्या सदस्य सचिव हरिबाबु चौधरी विदाई बिउगु खः ।
