सहमति कार्यान्वयनया निंतिं नेम्वाङया इनाप
संविधानसभा अध्यक्ष सुवासचन्द्र नेम्वाङं प्रमुख स्वंगू दलत दथुइ जेठ १४ गते जूगु सहमति कार्यान्वयन यायेत प्रधानमन्त्री माधवकुमार नेपालयात इनाप यानादीगु दु ।
आइतवाः प्रधानमन्त्री नेपालयात नापलाना नेम्वाङं सरकार प्रमुखया हैसियतं स्वंगू बुँदे सहमति कार्यान्वयनया निंतिं भूमिका म्हितेत प्रधानमन्त्रीयात इनाप यानादीगु खः । सहमति कार्यान्वयन मजूगुलिं जनताय् निराशा अप्वःगु व अन्यौल अप्वयाच्वंलिं प्रधानमन्त्रीयात सहमति कार्यान्वयनय् भूमिका म्हितेत इनाप यानादीगु खः ।
स्वंगू दलत दथुइ जूगु सहमतियात नेतातय्सं थःथःगु तरिकां व्याख्या यानाः दलत दथुइ असम्झदारी अप्वयाच्वंगु इलय् नेम्वाङं दलत दथुइ सहमति कार्यान्वयनया विकल्प मदुगु धयादिसें याकनं सहमति कार्यान्वयन यानाः राजनीतिक अन्यौल चीकेत प्रधानमन्त्रीयात इनाप यानादीगु खः ।
प्रधानमन्त्री नाप खँल्हाबंला लिपा वय्कलं पत्रकारत नाप खँल्हाबंला यानादिसें जेठ १४ गते बहनी जूगु सहमति कार्यान्वनय् दलत दथुइ विवाद खनेदुगुलिं सरकार प्रमुखया नातां सहमति कार्यान्वयनया भूमिका निर्वाह यायेत थम्हं प्रधानमन्त्रीयात इनाप यानागु कनादिल ।
