वर्कर्स पार्टीया न्याम्ह केन्द्रीय नेतात ज्वन
प्रहरीं घरान व झापाय् किराँत जनवादी वर्कर्स पार्टीया न्याम्ह केन्द्रीय नेतातय्त ल्वाभः सहित ज्वंगु दु । स्वन्हु न्ह्यः हे ल्वाभः, पार्टीया दस्तावेज सहित ज्वंपिं न्याम्हेसित प्रहरीं आइतवाः छगू पत्रकार सम्मेलनया दथुइ सार्वजनिक याःगु दु ।
आइतवाः धरान स्थित कोशी अञ्चल प्रहरी ज्याकूथी याःगु पत्रकार सम्मेलनय् ज्वंपिं थीथी थासय् लुटपाट व प्रहरी चौकी आक्रमणय् संलग्न जूगु खँ धाःगु दु । खोटाङ, झापा, सुनसरी लगायत थासय् अपहरण, जवर्जस्ती चन्दा फ्वनेगु लगायत ज्याय् उमिगु संलग्नता दुगु खँ प्रहरीं जानकारी ब्यूगु दु ।
प्रहरीं इपिं नापं जर्मनया पेस्तोल छपू, म्यागजिन छपू, स्वंगू राउण्ड गोली, टाइम बम छगः, सिं व प्लाष्टिकया नक्कली ल्वाभः, न्यागः मोबाइल, कम्व्याट वसः, खुकुरी, छग: पल्सर मोटरसाइकल, वर्कर्स पार्टीया विधान, लेटर प्याड लगायत समाना लुइकूगु दु ।
