गोप्य सहमति जूगु मदु : ओली
नेकपा (एमाले)या वरिष्ठ नेता केपी शर्मा ओलीं जेठ १४ गते प्रमुख स्वंगू दलत दथुइ जूगु स्वंगू बुँदे सहमतिलय् गोप्य सहमति मजूगु खँ धयादीगु दु । वय्कलं उगु सहमतिलय् स्वंगू बुँदा बाहेक मेगु छुं नं गोप्य सहमति मजुइगु धयादिल ।
युथ फोर्स नेपाल स्वदँ क्यंगु लसताय् युवा संघ नेपाल, येँ जिल्ला समितिं शनिवाः ग्वसाःग्वःगु बृहत कार्यकर्ता भेलाय् नेता ओलीं माओवादीं स्वंगू बुँदे सहमतिया बारे थःगु हे कथं व्याख्या याःगु धयादिसें अथे मयायेत माओवादीयात इनाप यानादिल ।
सहमति जूगु इलय् स्वंगू बुँदे गुलीया दुने कार्यान्वयन यायेगु धइगु बारे माओवादीं निन्हुया दुने कार्यान्वयन यायेगु खँ धायेवं सत्तारुढ दलं अथे खःसा सहमति पालना जूगु न्यान्हुया दुने प्रधानमन्त्रीं राजीनामा बीगु खँ धाःगु कनादिल । वय्कलं माओवादीं सहमति चाहिं कार्यान्वयन मयाइगु तर प्रधानमन्त्रीया जक राजीनामा फ्वनाः सहमतिलय् इमान्दार मजूगु द्वपं बियादिल ।
