जलवायु परिवर्तनया कारणं विकासोन्मुख देय्त थप मारय् : प्रम
प्रधानमन्त्री माधवकुमार नेपालं वातावरणीय विनास व जलवायु परिवर्तनया प्रभावय् विकासोन्मुख देय्त अप्व लानाच्वंगु दाबी यानादीगु दु । वय्कलं लगानी व क्षमता मदयाः विकासोन्मुख देय्त थप मारय् लाःगु खँ धयादिल । हरितगृह ग्याँस उत्सर्जनय् तःमि औद्योगिक देय्त अप्व जिम्मेवार जूगु नं वय्कलं धयादिल ।
विश्व वातावरण दिवसया झ्वलय् शनिवाः येँय् ग्वसाःग्वःगु छगू ज्याझ्वलय् प्रधानमन्त्री नेपालं जलवायु परिवर्तनया कारणं नेपाःया हिमताल जोखिमय् लाःगु खँ धयादिसें कृषि, जैविक, विविधता, जलस्रोत, स्वास्थ्य नापं वन क्षेत्रय् नं प्रतिकुल प्रभाव लाःगु धयादिल ।
अथेहे वय्कलं थुकीया कारणं आदिवासी व सीमान्तीकृत समुदायया रोजगारी जोखिमय् लाइगु खतरा प्रति च्यूताः प्वंकादिल । थुकीया बारे झीसं विश्व मञ्चय् सामूहिक व सशक्त सः ल्ह्वनेमाःगु खँय् बः बियादिल ।
ज्याझ्वलय् वय्कलं राजनीतिक स्थायित्व व वातावरण संरक्षण दिगो विकासया निंतिं पूर्वसर्तत जूगु धयादिसें वय्कलं शान्तिबिना नेपाःमितय् जीवनस्तर थकायेमफइगु व विकास बिना गरीवी न्यूनीकरणया झीगु कुत: सार्थक मजुइगु धयादिल । वय्कलं वातावरण व्यवस्थापन बिना दिगो विकास सम्भव मजुइगु दावी धयादिल ।
