'सहमति कार्यान्वयन याइगु पार्टीया नेतृत्वय् राष्ट्रिय सरकार'
संविधानसभाया अध्यक्ष सुवासचन्द्र नेम्वाङं प्रमुख स्वंगू दलत दथुइ जूगु स्वंगू बुँदे सहमति कार्यान्वयन याइगु पार्टीं राष्ट्रिय सहमतिया सरकारया नेतृत्व याये दयेमाःगु खँ धयादीगु दु । वय्कलं धयादिल, 'प्रमुख स्वंगू दलत दथुइ जेठ १४ गते जूगु स्वंगू बुँदे सहमतिया कार्यान्वयन सुनां याइ वंहे राष्ट्रिय सहमतिया सरकारया नेतृत्व याये दयेमा धइगु जिगु सुझाव खः ।'
उत्सर्ग प्रकाशन प्रालि झिदँ क्यंगु लसताय् शनिवाः येँय् जूगु छगू ज्याझ्वलय् नेम्वाङं स्वंगू बुँदे सहमति जूगु ४८ घण्टा मजुइवं हे स्वंगू दलत दथुय जूगु विवादं जनताय् निरासा ब्वलंगु धयादिसें स्वंगू बुँदे सहमति याकनं कार्यान्वयन यायेमाःगु खँय् बः बियादिल ।
वय्कलं न्हापा दलत छप्पँ जूगु इलय् संविधानसभाया ज्या निर्वाध रुपं न्ह्याःगु तर लिप्पांगु इलय् दलत दथुइया स्वापू स्यनावंगुलिं संविधानसभा नं प्रभावित जूगु धयादिल । वय्कलं संविधानसभाया ज्यायात निरन्तरता बियाः न्हूगु संविधान जारी यायेत दलत छप्पँ जुइगुया विकल्प मदुगु धयादिल ।
