झिंगुन्हु लिपा श्रेष्ठ सकुशल मुक्त
'हिन्दू जनता पार्टीं अपहरण'
झिंगुन्हु न्ह्यः निसें बेपत्ता जुयादीम्ह वीपी कोइराला मेमोरियल क्यान्सर अस्पतालया कार्यकारी निर्देशक डा. भक्तमान श्रेष्ठ शनिवाः सकुशल छेँय् लिहांझायादीगु दु । शनिवाः सुथय् ६ बजे डा. श्रेष्ठयात छेँजः व प्रहरीं सकुशल उद्दार याःगु खः ।
सकुशल उद्दार लिपा चितवन स्थित थःगु छेँय् थ्यंनेधुंकाः पत्रकारत नाप खँल्हाबंला यानादिसें वय्कलं थःयात हिन्दू जनता पार्टीं अपहरण याःगु कनादिल । तर वय्कलं हिन्दू जनता पार्टीं छाय् अपहरण याःगु धइगु बारे थप जानकारी बियामदी । श्रेष्ठया छेँ पिन दुपिं तःधंगु ल्याख्य् सर्वसाधारण व शुभचिन्तकतय्त वय्कलं ल्हा संकाः अभिवादन यानादिसें थःत अपहरणमुक्त यायेत पहल याःपिं दक्वसितं सुभाय् बियादिल ।
श्रेष्ठयात अपहरणकारीतय्सं शुक्रवाः बहनी धादिङ-चितवन सीमा राजमार्ग स्थित मजिमटारय् त्वःता थकूगु खः । अन त्वतेधुंकाः वय्कलं थः किजा जगतमान श्रेष्ठयात तुरुन्त काःवयेत खबर यानादीगु खः । लिपा प्रहरी पुचः नापं किजा श्रेष्ठ शनिवाः सुथय् खुताः इलय् अन थ्यंका: श्रेष्ठया सकुशल उद्दार याःगु खः ।
वंगु जेठ ४ गते अपहरणय् लानादीम्ह श्रेष्ठया सवारी पोखराय् लुइकूगु खःसा ब्रिफकेस चितवनया घोप्टेभिरय् लुइकूगु खः ।
