नेपालभाषा परिषद्या जीर्णोद्धार जूगु छेँ उलेज्या
येँ (सन्ध्या टाइम्स)/झी कवि चित्तधर 'ह्दयं' नेपालभाषा परिभाषा परिषद्यात लःल्हानादीगु ऐतिहासिक छेँया जीर्णोद्धार क्वचायेकाः थौं छगू ज्याझ्वःया दथुइ उलेज्या जुल। नेपाःया निंतिं भारतीय राजदूत राकेश सूदं उगु छेँया उलेज्या यानादीगु खः। वंगु असार २४ गते छेँ जीर्णोद्धारया शिलान्यास नं वय्कलं हे यानादीगु खः। ज्याझ्वलय् न्ववासें साहित्यकारया नामं संग्रहालय दयेकेत्यंगु नेपाःया छगूयां छगू ऐतिहासिक छेँया जीर्णोद्धार याये दयाः थःपिं तसकं लय्तायागु व थ्व छेँ मार्फत नेपाः व भारत लगायत विश्वया थीथी देय्लिसे सांस्कृतिक स्वापू क्वातुया वनेमा धकाः कामना यानादिल ।
येँया स्थानीय विकास अधिकारी गोपाल प्रसाद पराजुलीं थ्व छेँ भावी पुस्ताया लागिं छगू प्रेरणाया स्रोत जुइगु बिचाः प्वंकादिल ।
ज्याझ्वःया सभापतित्व यानादीम्ह नेपालभाषा परिषद्या नायः फणान्द्ररत्न वज्राचार्यं थौं जीर्णोद्धार क्वचायाः कन्हय् थ्व संग्रहालय जुइबलय् उकियात संरक्षण यायेगु भाला झी सकसिगुं जू वइ धयादिल ।
ज्याझ्वलय् भाजु वज्राचार्यं भारतीय राजदूत सूदयात सुभाय् पौ नं लःल्हानादीगु खः। जीर्णोद्धार जूगु छेँयात आः मेगु चरणय् चित्तधर 'ह्दय' व मोतिलानि उपासिकालिसे सम्बन्धित संग्रहालय दयेकेगु ज्या न्ह्याइ धाःगु दु ।
