गैंडां च्वयाः सैनिक घाःपाः
येँ (सन्ध्या टाइम्स)/चितवनय् गैंडां आक्रमण यानाः छम्ह सैनिक जवान बांमलाक घाःपाः जूगु दु। जिल्ला प्रहरी कार्यालं धाः कथं घाःपाः जूम्ह जवान स्यांजाया कोल्मा - ८ धाःगु थासय् च्वंम्ह २५ दँया अनिलनाथ पौडेल खः।
चितवन राष्ट्रिय निकुञ्जया बाघमारा क्षेत्रय् गस्ती यानाः वनाच्वंगु इलय् वयात उकथं गैंडां आक्रमण याःगु खः। आक्रमणय् लानाः सैनिक जवान पौडेलया छ्यं, दुगःक्वँय् व छातीइ बांमलाक घाः लाःगु दु ।
वयात म्हिगः हे सामान्य वासः यानाः येँय् छ्वया हःगु खः। आः वयात वीरेन्द्र सैनिक अस्पताल छावनीइ वासः याकातःगु दु। निला ति न्ह्यः नं जंगली किसिया आक्रमणय् लानाः चितवन राष्ट्रिय निकुञ्ज दुने हे छम्ह सैनिक जवान सीगु खः ।
हानं सीम्ह गैडा लुल
उखे चितवनया हे राष्ट्रिय निकुञ्जया मध्यवर्ती क्षेत्र अन्तर्गत कुमरोज सामुदायिक वन क्षेत्रय् थौं सुथय् छम्ह गैंडा सिनाच्वंगु अवस्थाय् लुइकूगु दु। सीम्ह गैंडाया न्यकू व खुर धाःसा सुरक्षित हे दनि। सीम्ह गैंडायात कयाः निकुञ्जपाखें अनुसन्धान न्ह्याकेधुंकूगु दु। लुमंकेबहः जू, वंगु वालय् तिनि अनया सतन्चुली सामुदायिक वनय् छम्ह गैंडा सिनाच्वंगु लूगु खः ।
