युटिएलया छेँ मिं नल
येँ (सन्ध्या टाइम्स)/पुतलिसतकया त्रिवेणी कम्ल्पेक्सय् च्वंगु युटिएल टेलिफोन सेवाया ज्याकुथी थौं सुथय् तःधंक मि च्याःगु दु। मिं नयाः म्होति नं छगू करोड तका बराबरया धनमाल नष्ट जूगु प्रारम्भिक अनुमान दु। थौं सुथय् साढे ६ बजे उगु छेँया च्वय् कुँ त्याः पिहां वयाच्वंगु खने दुगु खः। कुँत्याः पिहां वयाच्वंगु खनेवं स्थानीय मनूतय्सं हे प्रहरी व दमकलय् फोन यानाः उकिया बारे जानकारी बिउगु खः।
मि स्यायेगु लागिं येँ, यल व ख्वपया समेत दमकल थ्यंकः वःगु खः। उगु मि मेथाय् न्यनावनी धकाः ग्यानाः जःखः च्वंगु आपालं छेँ खाली नापं याकूगु खः। मिं यानाः उगु लागाय् आतंक नापं ब्वलंगु खःसां दमकलं लिपा मि धाःसा पूवंक हे नियन्त्रणय् काःगु दु ।
