चिकुला अधिवेशन क्वचाल
येँ (सन्ध्या टाइम्स)/ संसदया ताल्लाया अधिवेशन सःतेगु ई त्ययेधुंकल तर चिकुलाया अधिवेशन हे म्हिगः तिनि क्वचाल। म्हिगः बहनी ९ बजेनिसें संसदया चिकुलाया अधिवेशन क्वचाःगु घोषणा सभामुख सुभाष नेम्बाङं यानादीगु खः ।
ताल्लाया अधिवेशन सःताः बजेट पेश यायेमाःगु इलय् नं चिकुलाया अधिवेशन न्ह्यानाच्वन धइगु खँय् टिप्पणी शुरु जुइवं म्हिगः उकियात अन्त्य याःगु खः। तर सरकारं सहमतीय राजनीतियात छखे वांछ्वयाः यकःति ढंगं अधिवेशन अन्त्य याःगु धइगु द्वपं बिसें विपक्षी माओवादीं धाःसा म्हिगःया सदन बहिष्कार याःगु खः। माओवादी सदन बहिष्कार यानाः पिहां वनाच्वंगु हे इलय् सभामुखं अधिवेशन क्वचाःगु घोषणा यानादीगु खः ।
