बेपत्ता डाक्टर मालेत हानं मेगू समिति
झिंच्यान्हु न्ह्यः निसें बेपत्ता जुयादीम्ह चितवन स्थित बीपी कोइराला मेमोरियल अस्पतालया कार्यकारी निर्देशक डा. भक्तमान श्रेष्ठयात मालेत हानं मेगू छानबिन समिति गठन जूगु दु । नेकपा (एमाले)या युवा संगठन नेपाल युवा संघं शुक्रवाः छगू पत्रकार सम्मेलन यानाः राजीव पहारीया संयोजकत्वय् न्हय्म्ह दुजः दुगु छानबिन व ग्वाहालिया निंतिं युवा आयोग गठन याःगु दु ।
बेपत्ता श्रेष्ठया अवस्था बारे सत्यतथ्या पत्ता लगे यायेत गठित उगु आयोगय् सूर्य ढकाल, कमल पाठक, किरण पौडेल, रमेश पौडेल, पार्वती सिलवाल व प्रकाश ढुंगना दुजः कथं च्वंगु दु । छानबिन आयोगं श्रेष्ठ सम्बन्धी घटनाया छानबिन यानाः यथाशिघ्र सत्यतथ्य पिने हइगु जानकारी संघंया अध्यक्ष महेश बस्नेतं बियादिल ।
जेठ ४ गते अपहरण जुयादीम्ह डाक्टर श्रेष्ठया बारे छानबिन यायेत स्वतन्त्र नागरिक नापं एनेकपा (माओवादी) लगायतं थ्व स्वयां न्ह्यः हे छानबिन समिति गठन यायेधुंकूगु दु ।
