माओवादीं बेइमानी याःगु कांग्रेस-एमालेया द्वपं
एनेकपा (माओवादीं) स्वंगू दलत दथुइ जूगु सहमतियात सत्तारुढ नेपाली कांग्रेस व नेकपा (एमालें) अपव्याख्या याःगु धका: द्वपं ब्यूगु कन्हय् कुन्हु हे निगू दलया बैठकं माओवादीं सहमति त्वाःथला बेइमानी याःगु द्वपं ब्यूगु दु ।
शुक्रवाः सुथय् प्रधानमन्त्री निवास बालुवाटारय् च्वंगु सत्तारुढ निगू दलया शीर्ष नेतातय् बैठकं जेठ १४ गते जूगु सहमति प्रति घात यानाः माओवादीं एकपक्षीय रुपं आन्दोलनया घोषणा याःगु द्वपं ब्यूगु दु । उमिसं माओवादीं सहमतिया लँपु त्वःता बेइमानी याःगु खँ धाःगु दु ।
बैठकं शान्ति प्रकृया, संविधधान निर्माण व राष्ट्रिय सहमतिया सरकार निर्माणयात प्याकेजय् हे हल यायेमाःगु धासें माओवादीयात सहमतिलय् वयेत नं इनाप याःगु दु । निगू दलं माओवादीं लडाकु समायोजन व पुनर्स्थपना, वाईसीएलया अर्ध सैन्य संरचना भंग, कब्जा यानातःगु सम्पति लितबीगु विषयलय् समयसीमा सहितया स्पष्ट कार्ययोजना बीधुंका जक प्रधानमन्त्रीं राजीनामा बीगु अडान काःगु दु ।
