माओवादी आमहड्तालय् लाडकुतय् नं ब्वति : ओएचसीएचआर
संयुक्त राष्ट्रसंघीय मानवअधिकार उच्चायुक्तया नेपाः स्थित ज्याकूथीं एनेकपा (माओवादीं) खुन्हु तक याःगु आम हड्तालया झ्वलय् लडाकुतय्सं नं ब्वति काःगु प्रतिवेदन सार्वजनिक याःगु दु ।
ओएचसीएचआरं बिहीवाः सार्वजनिक याःगु प्रतिवेदनय् आमहड्तालय् अस्थायी शिविरया माओवादी जनमुक्ति सेनाया दुजःत संगठित रुपय् संलग्नता जूगु पुष्टि छथाय् खनेदुगु खँ न्ह्यथनातःगु दु । रोल्पा जिल्लाय् जनमुक्ति सेनाया दुजःतय् अस्थायी शिविर क्षेत्र पिने केन्द्रीय स्तरया नेतातय् निर्देशन कथं लँय् अवरोध यानाः उकी ब्वति जूगुलिं थुकीया पुष्टि याःगु खँ प्रतिवेदनय् न्ह्यथनातःगु दु ।
माओवादीं वैशाष १८ गते निसें खुन्हु तक याःगु आम हड्तालया झ्वलय् माओवादीं देय्न्यंक चन्दा फ्वंगु खँ न्ह्यथंसें प्रतिवेदनय् विराटनगरय् चन्दा मब्यूगु प्रतिशोधय् छगः विद्यालयया बस च्याकूगु खँ न्ह्यथनातःगु दु । अथेहे माओवादीं बन्दय् १८ दँ क्वयेया मनूत छ्यगु, उमित कथि तालिम बियाः बन्दय् खटे याःगु, विरोध ज्याझ्वलय् मस्तय्त न्ह्यने सारे याःगु खँ नं प्रतिवेदनय् दुथ्याकातःगु दु ।
बन्दया झ्वलय् सुरक्षा निकायं संयमता नालाकाःगुलिं भिडन्तया घटना मजूगु व प्रहरीं हे शुरु याःगु प्राथमिक वासः पुचःया कारणं घाःपाः जूपिं प्रदर्शनकारीयात ग्वाहालि जूगु खँ न्ह्यथनातःगु दु । अथेहे बन्दया कारणं गरिव व सीमान्तकृत समुदाय पीडित जूगु व छुंछुं जिल्लाय् खाद्यान्य अभाव जूगु खँ धाःगु दु । बन्दया कारणं विद्यालय बन्द जुयाः शिक्षा अधिकार कटौति जूगु खँ नं प्रतिवेदनय् न्ह्यथनातःगु दु ।
