देय् दबू नेतृत्वय् कडा धेंधेंबल्लाः
धनकुटाय् जुइत्यंगु नेवाः देय् दबूया न्याक्वःगु तःमुँज्याय् नायः पदया निंतिं निम्ह उम्मेदवारया प्रतिस्पर्धा जुइगु जूगु दु । नायः पदय् दनेगु लागिं आःयाम्ह पूर्वाञ्चल न्वकु नरेश ताम्रकार व पुलांम्ह मू छ्यांज्ये नरेशवीर शाक्यं उम्मे-दवारी बीगु जूगु दु ।नायः पदया निंतिं आः तक घोषणा जूगु नां थ्वहे निगू खःसां धनकुटाय् मेगु कथंया समीकरण तयार जुइफुगु खँ धाःगु दु ।
अथे हे मध्यमाञ्चलया न्वकु पदया लागिं नं तःम्हमछि उम्मेदवार दथुइ धेंधेंबल्लाः जुइगु संकेत पिहां वःगु दु । आः तक सीदु कथं नेपालभाषा मंकाः खलः यलया नायः सुरेश प्रधान, विराट साहित्य सम्मेलन गुथिया त्रिरत्न शाक्य, नेपालभाषा मिसा खलःया धर्मशोभा तुलाधर, लोकसाहित्य परिषद्या प्रेमशान्ति तुलाधर व ज्यापु महागुथिया उर्मिला डंगोलपिंसं थःपिनि उम्मेदवारी घोषणा यायेधुंकूगु दु ।
देय् दबूया थ्व तःमुँज्याय् करिब ४० गू जिल्लापाखें ७०० स्वयां अप्वः प्रतिनिधि-तय्सं ब्वति काइगु जुयाच्वंगु दु । स्वनिगलं पिने न्हापांखुसी थ्व तःमुँज्या जुयाच्वंगु खः ।
