हिउँदे अधिवेशन क्वचाल / माओवादी पाखें संसद बहिष्कार

व्यवस्थापिका संसदया हिउँदे अधिवेशन बिहीवाः क्वचाःगु दु । बिहीवाः न्हिनय् च्वंगु संसदया बैठक प्रमुख प्रतिपक्षी दल एनेकपा (माओवादीं) बहिष्कार यायेवं सभामुखं हिउँदे अधिवेशन क्वचाःगु घोषणा यानादीगु खः ।

माओवादीं जेठ १४ गते प्रमुख स्वंगू दलत दथुइ जूगु स्वंगू बुँदे सहमतियात कांग्रेस व एमालें उल्लंघन याःगु धासें संसदया बैठक बहिष्कार याःगु खः । संसद बैठक शुरु जुइवं माओवादी सभासद् देव गुरुङं सत्तारुढ दलतय्सं सहमति विपरीत थःथःगु व्याख्या यानाः सहमतिया उल्लंघन याःगु व प्रतिपक्षीया सहमतिलय् कायेमाःगु निर्णय नं एकपक्षीय ढंगं याःगु धासें संसद बहिष्कार यायेगु घोषणा यानादीगु खः ।

माओवादीं संसद बहिष्कार यायेवं प्रधानमन्त्रीया सिफारिसय् राष्ट्रपतिं छ्वयादीगु पौ सभामुख सुवासचन्द्र नेम्वाङं ब्वनाः न्यंकादीगु खः ।